GATSBY與SMATSBY
木村拓哉的GATSBY廣告有多人氣，當然唔駛我多講，亦唔駛香港亂繼續亂，我最近還在街邊聽到有人用I can give you GATSBY這廣告歌的鈴聲，我覺得真正深入民心。 這是一個GATSBY潔面乳的新廣告，依然係騎尼得o黎又幾好笑，好笑得o黎有幾型仔咁話，嘩，果條肥仔如果俾星爺睇中呢…..。 睇完正版，記住記住記住要睇埋木村在SMAP x SMAP內的自嘲版，我覺得更好笑。(留意個老番LOGO!!)
更換兒童拍攝模式的動畫—Samsung ST-550
有網友問我，啟動這部Samsung ST-550 DC仔的兒童拍攝模式時，在前面屏幕出現的動畫可否更換，當時我說不可以，我仲寸人細蚊仔同小動物邊識嫌悶？ 後來，我發覺我錯了，查實第一個睇厭了同一條動畫轉來轉去的，是我自己。於是我馬上上網睇睇有咩解救，點知真的給我搵到20條可讓我更新的動畫。 http://www.samsungimaging.net/new-animations-for-your-st550tl225st500tl220s-children-mode 方法簡單到暈，下載了所選檔案後，Unzip，將檔案Drag入DC仔的Memory卡內，關機，再開機時，系統便會自動更新，下次啟動相機，新的動畫便會出現。
True Blood係咪即係成人版Twilight？
繼Mad Men之後，True Blood是我近期最愛看的電視連續劇。 有人話True Blood是Twilight的成人版，這個我只同意一半。 True Blood的大橋是這樣的，在某個現代時空的假設世界內的路易斯安那州中某某小鎮內，吸血殭屍的存在已成了一個人類公開的事實，做了這麼多年世仇，要人類與吸血殭屍和平相處，當然唔係話咁易。 一人行一步，吸血殭屍社群先讓步，決定集體食長齋，不再吸人類的血，而是飲7仔都有售的樽裝ABC型血。但部份陰險的人類卻發現了飲吸血殭屍的血原來仲High過食海洛英，殭屍血有市場，所以又開始暗地裡密謀綁架殭屍取其血液。 True Blood這套劇，集怪誕、暴力與情色於一身，當中又涉及對人類的陰暗面、宗教狂熱者的偽善等話題，小朋友唔睇得，衛道之士更千祈咪睇。 True Blood已做完兩個Seasons，但千祈千祈千祈不要看電視播的版本，因為一定剪到支離破碎，要睇，就要睇原裝版，DVD在HMV有售。
Be water my friend
這是很多很多年前的一段李小龍訪問片段，如今已變成經典。 最近看到有人用Kinetic Typography的手法，再次演繹這番話的意義，奧妙但不深奧。
防曬粉底，最啱女殭屍
近年又Twilight又True Blood，幾乎以摩登吸血殭屍為題材的電影電視小說都總有市場，這令我想起當年(差不多十年前)，我曾經在泰國看過的這條電視廣告。 唔講得笑，第一次看時，我真的O了咀，唔識反應，你會覺得，究竟邊個客可以咁有幽默感，連吸血殭屍呢條橋都Buy，仲要係用番最傳統的P&G式Problem & Solution Formula，真係吹佢唔脹。
固執得漂亮—風見志郎
我得承認，我還是到了Ten Days In The Madhouse 才開始認真去聽何韻詩的歌的。 常覺得，這個社會，說話的太多，說完會做的太少。 何韻詩是我們這個社會中少數說完會做的人，更難得的，她是一個歌手，固執之餘唔煩到人又會身體力行的，這類人我最欣賞。 我不知道在這晚音樂會中忘我地尖叫著「阿詩你好型阿菇你好靚」的粉絲們，當中有多少會認真理解她歌中的意義，但我心諗：「有人同佢講點都好過無啦」。 「風見志郎」是Ten Days In The Madhouse全碟中我最欣賞的一首歌，亦是這晚音樂會中，我最有感覺的一刻。 風見志郎是誰？和我差不多老餅的大男孩，當然會知道他就是同時擁有幪面超人一、二號的能力，腰帶上有兩個風車仔的V3，他「像奇異生物，任世間指點，怪一點點，寧願孤身在戰」。 日本特撮英雄的方程式是這樣的，那位超級英雄永遠會在人類有需要的時候變身出現，可是，雖然英雄與變身前的主角二人同體，但由於沒人見過英雄變身，即使二人永遠擁有同時不在同一現場出現的證據，這世上永遠無人知道他們是同一人，英雄真身無論為人類犧牲了多少，永遠都沒有人知道，更要久不久給人臭罵無膽匪類，次次出事才玩失蹤。 唯一知道這秘密，對他抱以無限崇敬的，只有坐在電視面前的我的這觀眾。說起來有點弔詭，但現實世界，我常覺得這類無名英雄其實無處不在。 努力呀，風見志郎，堅持落去呀，何韻詩，地球需要你。 風見志郎 主唱：何韻詩 作曲：陳奐仁for the invisible men．何秉舜@goomusic 填詞：林若寧 編曲：陳奐仁for the invisible men．何秉舜@goomusic 監製：陳奐仁for the invisible men．何秉舜@goomusic．hocc@goomusic 歌詞 沒名字的臉 夕照的剪影 因山水抗戰 像奇異生物 任世間指點 怪一點點 寧願孤身在戰 被困這溫室甲蟲也感染 用渺小的觸角力抗這偏見 沙粒也顫抖 一粒一粒一粒拯救 伸張非一般的正義得一對手 可能他的身軀好比妖獸 一天一天稀釋價值得他甘心去守 默然稻草田 被瞬間剪短 將磚片搭建 但幪面青年 入世雖短淺 都死守流失的海岸線 像最小的甲蟲也苦戰 用最蠢的方法但勇敢依然 冰川也顫抖 一些一些一些拯救 得出多悲哀的結局他都不甘脫勾 就算昆蟲 他都珍惜牠的罕有 不肯棲息摩天塔下一心退休 人間風景 沒法一幅一幅出手拯救 他忠於的一些價值鋪於四周
既然廢問不如廢答—模擬周秀娜與教授對答
今早網友Jansen介紹了A Hammer’s Blog的模擬周秀娜與教授對答 佢老哥吹雞叫大家齊齊玩，我趁飯氣攻心要先醒一醒之餘，於是我又玩埋一份。 李：你覺得呢個年紀o既人，有乜共同特色？ 路：到我呢把年紀o的麻甩佬，特色就係愈老愈好色。 李：除o左呢樣，生活上呢？ 路：同上一代唔差同o既野 李：有乜唔差同？ 路：例如BT啦，上一代仲要去幫襯四樓有四仔，我地呢一代就自給自足。。 李：你係咪覺得呢代人好鍾意激烈情緒同情感上得到愉悅？ 路：我想頂你個肺算唔算激烈情緒？你肯當眾俾我頂我就可以o係情感上得到愉悅喇。 李：自拍愉悅係咪快樂一種？ 路：死金魚佬，你查實係咪想問我自拍會否產生高潮？ 李：自拍同反叛有冇關係？ 路：你影証件相夠係自己拍自己啦，咁你算唔算反叛先？ 李：有冇曾經後悔？例如為讀書冇睇一場騷。 路：我最後悔係為趕住o黎o左你呢場騷今朝無剃鬚。 李：對於我冇睇騷，你有乜comment？ 路：証明你係勁自閉兼查實係死孤寒鬼。 李：依家年輕人係點？ 路：依家o的年輕人就係成日俾你呢類大學廢柴老點。 李：咁你有冇衝動同欲望梳理自己？ 路：講o野就講直接o的啦，你係咪驚我修理你先？ 李：你覺得年輕人追求自己或做緊乜o野係咪好重要？ 路：如果俾你教過o的年輕人，畢業後應該以「叫大學回水」為人生目標。 李：快樂對你o黎講係咩？「你快唔快樂」？ 路：快樂就係我慶幸自己無讀過你教果間大學，唔駛俾你呢類廢柴教。阿教授麻煩你轉過身俾我一腳伸你落台，我同在坐所有年輕人就唔慌唔快樂喇。
帶著ST550去旅行(二)—我很醜，但我好味到你口水流。
抵達吉隆坡，在機場租了車，入到城已經差不多三點，第一時間，當然就是去了醫肚。 早聞若然要在KL搵好o野食，就一定要到街邊檔搵，熟路的女友(她是馬來西亞人)和她的老友話，既然係第一餐，不如就食「豪」一點。 但原來所謂「豪」，都係每人30蚊港紙唔駛的路邊蕉葉咖哩放題任食餐。 聽人家說馬來西亞的節奏比香港慢得多，但講到食，效率卻相當高，我們才坐下，侍應已拿拿臨幫我們舖好一人一塊的蕉葉，我還在諗吃什麼時，前菜已在我面前出現。 先來點瓜菜，這邊的芽菜明顯比我們在香港食慣的粗大，青瓜相當爽口，咖哩薯仔有點像我們平常吃的韓式冷盤前菜，但這款較辣。 我知我知，這三桶咖哩汁的賣相真的嘛嘛，但查實係極好味，佢地分別係魚、牛及羊汁味，我個人就最喜歡魚汁味。 你睇你睇，成「篤」倒落堆飯度，嘩，真係好肉酸，但撞鬼佢丫，點解又咁鬼好味。 我的主菜(當然還有不能盡錄的其他菜色)，就是上面的兩款—炸洋蔥魷魚和炸雞，這兩款美食表面上相當熱氣但查實係極之極之熱氣，但當中醃製的香料，味道相當複雜兼充滿層次，食了幾乎成碟我除了還未停到口，我還在想在想，究竟裡面用了什麼香料醃製的呢？ 我還是很懶地只啟動了我這部Samsung ST550的Smart Auto Mode，任相機幫我選用設定場景，除了店舖的兩張照片，上面的幾張食物相，都是微距場景拍攝的。我發覺這部機好像對綠色特別情有獨鍾，四周環境的綠油油效果都亦為突出，還好，照片拍出來的色溫平衡感良好。
鐵人28開幕誌慶，好睇過國慶閱兵。
鐵人28建設報告：佢已經好威武地大大隻咁企左晌處，為隆重其事及紀念這歷史性時刻，開幕當日，神戸市長矢田立郎及大批達官貴人企業高曾紛紛出席，同場更有西裝畢挺的鐵人28合唱團助響聲勢。 我真的衷心敬佩並羨慕人家對我們以為區區的一個卡通人物的堅持、認真和執著，真係少一滴熱血也不行。 你睇睇下面幾張相，你就知道工程是如何的浩大，鐵人28，我向你致敬。 原文網頁：http://www.kobe-tetsujin.com/monument.html
Xanga CTO Dan Huddle到訪敝公司
昨天有客自遠方來，Xanga的CTO兼創辦人之一Dan Huddle來訪，與我們公司的同事們分享一下Xanga的好些新動向。 唔講唔知，原來香港是Xanga除美國以外具最高滲市場透率的地方，在香港有百多萬用戶，並流行於年輕人市場，你見AngelaBaby、GEM和Janice Man等等都是在此落腳，你就大概知他們的群組實在青春無敵。 我笑問Dan知不知道香港的Teen Model現象，來自New York的他居然一句”Of course, you mean Lang Mo?”，於是我便笑說Xanga不如自己攪個o靚模選舉，順便做埋經理人啦。 (我偷偷地用我正在試機的Samsung ST550 DC仔，放在台上玩時間掣自拍，當DC仔前面熒幕倒數3-2-1時，給我右手邊的女同事發現了) Dan送了我一件中碼，拿起手卻像是大碼，果然係美國Size。 整個分享在愉快的氣氛下結束，臨別時，最開心的莫過於我公司的Xanga用戶們(他們正好是全公司最年輕的一群)，因為Dan送了他們人人一件Xanga Tee，雖然我一把年紀，明顯不是Xanga用戶，我都有一件，哈哈，你睇我開心到呢。