巴里島的SPA 及溫泉回憶
今朝晌Messenger遇上剛從泰國旅行回港o既朋友，聽佢講說起她的泰SPA之旅，又順便問問我早排去巴里島果陣有無去SPA咁話。 唉，自問勞碌半生，都好少話識食識嘆，之不過，今次o既巴里島之既然已經有人請，唔應該再刻薄自己，於是便做了我幾十歲人第一次的SPA。 經導遊介紹，去了一個位置相當隱閉的地段，直情有點「尋找隱世SPA術」的感覺。 去到才知道，這條單邊大大話話有二三十間獨立洋房的林蔭小路，原來都是清一色的高級度假屋，即是成間屋包起來住的那種，而那間SPA，就設於其中一所兩層高的度假屋內。 進入去後，都是例牌的選擇和議價，我揀了一個最例牌的4小時套餐，然後又揀了我較喜歡的sandalwood及lavender香薰油，之後那位本來負責接待的便在講「唔該過o黎呢邊」的同時，轉個頭便原來「又是她」負責我的整個SPA療程，真係一腳踢。 先 來全身massage一小時，然後就來一回全身泥漿磨死皮，之後，又有一系列的facial, scrub & body mask，敷mask期間，治療師出了外面打牙較，我就一條死魚咁攤晌處，一面乾o左，反轉，重覆，由於日光白白我o訓唔著，這個部份我覺得勁悶。 之後，就是我覺得有點搵笨的花瓣浴，沖乾淨涼，過隔離房做head massage，做得唔係太耐，然後才知道這環節其實是主力幫我侷油，那個好似我細個果陣見阿媽在上海理髮店所用的巨型頭罩式恤髮器，罩了我成半粒鐘，之後人地幫我梳了一個蛋撻頭，4個鐘頭便玩完。 雖然一o的都唔算貴，只係盛惠$400左近，但下一次，我情願做足四個鐘頭massage，那些姿姿整整的，真係唔係太o岩我呢亭麻甩佬。