樂天香口膠一百萬(Yen)舞王大募集

FIT’s 係日本樂天的香口膠,最近在網上搞左咗單舞王大賽,叫各路舞林高手一齊較量,齊齊條佢地果隻FIT’s舞。

廣告由曾飾演幪面超人電王的佐藤健,以及CM女王佐々木希演出,留意後面伴舞隻狗同埋個模特兒公仔,好頂癮。

唔知係咪因為夠低B,雖然做嘅嘢差唔多,但又真係好睇過Shake Shake薯條多多聲,我睇左兩條片兩次,首15″ Jingle已經入哂腦兼識得唱,唔通真係隔離局飯香?

再睇埋果班參賽者嘅熱情參與,真係笑到碌地。


又來兩條viral,羊咩車車大堆頭大併圖。

不約而同找到兩個廣告,都是我經常在這裡講的所謂Viral 短片(放上互聯網靠口碑相傳的廣告片),水準各有千秋,我就覺得羊咩咩的那條因為有動物元素,多點好感印象分,贏兩三個馬鼻。

你又喜歡那一條?祝大家有個愉快週末。

以法國名導高達手法拍美國電視劇24再crossover賣Stella啤酒,真係俾佢吹到啤一聲。

剛看了這條英國佬做創意扮法國人拍美國電視劇24查實幫比利時啤酒品牌Stella Artois拍的網上廣告片,如果你都對法國名導Jean-Luc Godard(高達:唔係機動戰士果位呀)電影略有所聞,加上又睇過下美國電視連續劇24的話,你才會覺得這條片有多頂癮。

唔少歐洲廣告就係咁,硬係喜歡同你兜個大圈先至覺得為之有料到,如果唔係,當地消費者可能會藐爆你。

如果睇完呢條片仲未夠喉,上網睇埋另外兩條。
www.smoothoriginals.com

BEN仔上載YouTube片代父搵工

呢位後生仔阿BEN為加入了失業大軍o既老豆,製作了這條短片,硬Sell佢伯爺。

放上YouTube後,一星期便吸引了過6萬的瀏覽人次,聽講話,阿BEN老豆呢個禮拜開始忙於見工,握手握到手軟。

此片製作簡陋,創意乏善可陳,簡單一句:毫無章法,可是,其Viral效果卻立竿見影,點解呢?

我沒有絕對答案,但我平日一聽到同事或客戶講想攪所謂的Viral video我就頭痛,因為我明知,你地左度右度船頭驚鬼船尾驚人,咁又唔得咁又話怕消費者唔知我賣咩的心態去做一條YouTube片,九成唔work。

講溝通,誠意和誠實,最緊要。

但最最最緊要,連自己想講個咩o野故仔俾人聽都未攪清楚,一味話要Viral,真係Viral你個死人頭。

0.02mm距離的愛

看見這個標題,你可能會以為是日本動畫家新海誠的另一套愛情小品。查實非也,這套其實是去年聖誕前夕一個月,在日本上演的一套網上真人騷。

話說這雙日本情侶,兩人熱戀卻分隔異地,一個住在東京,一個身處福岡,因為愛情的力量,兩人決定奔向對方(但唔明點解唔搭車要堅持行路),於是,網上便直播了這段歷時近一個月的愛情馬拉松,由10億mm的距離開始,到最終兩人在路上某點相遇,喜極相擁,但故事到這裡,雖然已經大團圓,但尚未告一段落….

我先不開估,希望大家能花少許心機,先看看這套廣告片,然後自己發掘故事結局。

玩緊扮做嘢,做嘢扮玩緊 Microsoft Office for Mac

「家陣D後生仔,晌Office度一日對住部電腦,都唔知係做緊嘢定玩緊。」

話說某一天,我還在做CD的日子,從前公司的某某大老闆,路經我的房間,在咁啱又對住部電腦查實又唔知玩緊抑或係做緊嘢的我面前如是說。

我向他支吾以對了幾句,然後等佢一擰轉背,繼續開番晒剛才都唔知算係搵reference定搵娛樂的internet browsers出來。

用mac機有個好處,有咩風吹草動,可以閃得好快。

家陣番工要用PC,真係無咁方便。

博客營銷Blog Marketing

話說今個月初有幸被邀,前往新加坡參加了PRADA Phone的產品發佈會。

同行的,還有8位香港Bloggers。他們當中有搞網上電台的、有主攻電子產品的、有研究互聯網現象的、有發燒任何最新手機高科技的,更有專寫時尚生活及美容化妝的,至於我,相信是一個品牌營銷活動的旁觀者吧。

Blog Marketing不是甚麼新事物了,但在香港,肯這麼大手筆搞越洋活動的,相信還是第一次。

抵達產品發佈場地,除了見到不少來自不同國家的傳媒(包括CNN),更包括了一批Bloggers,香港以外,我們更遇上了新加坡及馬來西亞的Bloggers,比起他們,我們都明顯「成熟」得多,他們當中更以「潮」人(童)為主。

在發佈會上,一如專業記者,香港Bloggers都有機會發問問題。同行的資深BloggerJansen,可能因在記者會上問了一條頗為專業、有關PRADA Phone 作業系統的問題,事後更被CNN記者訪問。

產品發佈會後,我們一起被安排了產品試玩(平均兩個人一部機),並來了一會自發功的圓桌討論,對於我這為手機門外漢來說,獲益良多。


品牌邀請Bloggers參與營銷活動,相信會繼續出現,而且愈來愈多。但我想,除了叫我們嘻嘻哈哈來試玩產品外,是不是可以更有組織性地,讓我們更早參與產品的宣傳活動呢?

一般Bloggers,只要是他們有興趣的事物,他們都是頗能自發功攪攪新意思的,因為,有別於傳統媒體,他們不是受薪寫稿,不用交功課更不用向Sales交待,Bloggers喜歡「互動」而並非「被動」,Blog Marketing的重點,就在這裡。

上網都可以曬太陽?

這間名為Computertan的公司,可以為你提供網上曬太陽服務,對住部電腦,你就可以透過高科技的紫外光燈,曬到好似古天樂一樣的古銅膚色。

此外,佢地仲提供iPhone便攜版,俾你隨時隨地曬一曬,去到邊都用得,仲方便過用靈格風。

唔信咁筍?自己睇。

咁先算Viral?

多得當年的巴士阿叔,今時今日,好多客仲耐唔屎會叫廣告公司拍條片擺上網,以為咁就會Viral,哎呀,唔該啦,你開口埋口話要educate班消費者又要hard sell又要賣產品左計右計又要乜又要柒,點解唔索性搵無線拍條infomercial或搵靈速傳播拍條德成果類呢?上youtube,邊個會特登睇呢D片呀?

講開Viral,英國的吉百利朱古力便索性成立了一間虛擬製作公司Glass and a Half Full Productions,不定期製作那類等你睇完得啖笑然後又會forward來forward去的Viral Video,目的都係上搏取大家對品牌的好感,至於那個官方的”Losing yourself and embracing that moment of joy” 品牌訊息,收到就好收唔到都起碼唔會覺得你剋人憎,其實廣告就係咁。

我唔敢講呢條片可唔可以幫到吉百利在英國賣多幾多包朱古力,但係講Viral,呢條片放了上youtube個多星期已經有過百萬瀏覽(只計official那一條,還未計其他人自己upload的),兼無數bloggers廣泛討論(今日又多了我一個),鬧好讚好,已經達到Viral的基本目的。

我一路睇,一路笑到眼眉調。