幪面超人劇集內經常行先死先果班二打六壞人，究竟點稱呼？ 問過幪面超人專家肥倫，佢好正經咁答我話：「佢地一般被統稱為戰鬥員」，而坊間就向來慣稱他們為Geek Geek，因為佢地出親場，都係Geek Geek聲咁叫。 無諗過呢班Geek Geek都有出頭天，呢個求職廣告，翻炒幪面超人一號的舊Footage，然後從Geek Geek的角度出發，配上抵死的字幕心聲，再加感人配樂，那份富大時代悲哀的「唔想撈死呢份工」之內心世界，刻劃得透徹入微。 我一路睇，一路笑到Geek Geek聲，Geeeeeeeeeeeek!!!
同人誌式自家製作也有如此水準，真係不得不寫個服字。 不過博派Mac似乎人多蝦人少喎，雖然我都覺得PC抵死(裝埋Vista應該死得仲快)，因為我日日被迫用，日日媽媽叉。
這是今年康城廣告獎的最佳廣告片大獎得主，作為廣告行中的最高榮譽，頒獎禮後很多人都覺得不以為然，更有很多人看完覺得不明所以，覺得這條來自英國的廣告片，有乜咁特別，唔通真係文化差異？ 究竟吉百利朱古力同隻扮Phil Collions打鼓猩猩王，有咩關係？ 我淨係想講，我第一次睇這條片的時候，我真係笑到咳，因為佢令我諗起自己我個小學同學龍哥，我肯定他一定試過趁屋企無人果陣，幾張凳仔出，然後再兩支筷子或者一對真鼓棍，開「行」套Hi-Fi，播住Phil Collions呢首In The Air Tonight，然後邊聽邊幻想自己是Phil Collions，扮打「無影鼓」。 唔好笑人地，我都試過。 一邊聽一邊耐心等候，終於等到Drum Solo果Part，然後打其「無影鼓」，那一刻的快感，大概就是這個廣告想形容一啖咬落排吉百利朱古力果一刻的感覺吧。 唔知大家有咩意見？
幾乎由70年代尾打後到現在，不管你是那一個年代的靚仔，你都一定曾經和這「戰隊」系列的日本特撮電視片集擦身而過，又不管你對這來來去去也是那五款顏色的五勇士恐龍戰隊五星戰隊或Power Ranger有否任何喜惡，你也不得不承認，他們這五隻跳紮紮兼一出場便會擺陣的所謂超人戰隊，都早已成為不知跨越多少個年代的我們的集體記憶。 在香港，我們最近先有軟硬向「戰隊」致敬的唱片造型，然後「軟硬戰隊」去了賣廣告，打救老麥。 「戰隊」原產地日本呢？剛剛今早從youtube看到了一段三分多鐘的短片，見一名上班族路過秋葉源街頭，失驚無神，突然被一隊接一隊的 五「色」戰隊攔截，然後窮追猛打。 走投無路，這名戇居居的上班族，最終屈服，變成了他們的一份子，最後以一句 “play colorful”點題，充份體現出日本後現代非典型結構性的無聊力量之能耐。 不知道看慣了向來大製作大明星的Nike廣告的你，看到這支短片又有何感受？