平時一般電訊公司，賣廣告賣來賣去都係果三幅披，都離不開話自己點平至平特別平果隻，但TalkTalk這家英國電訊公司，最近便推出了PutPocketing這個廣告Campaign，大賣自己話：唔覺唔覺，我就會塞錢入你袋；唔會好似其他電訊公司今咁，唔覺唔覺，連果一個幾毫都要「滾」你。 TalkTalk真係講得出做得到，找來了一些前專業扒手，在倫敦街頭，四圍靜雞雞咁塞錢入人地個袋。 文雀扒水你聽得多，「科」水你見過未？TalkTalk拍了這條短片，作為Viral，手法之高明，與他們顧用的文雀不相伯仲。 唔好同我討論香港d客九成唔受又乜又物，我只係想大家欣賞一下，就是人家如何將一個講到爛的What to say，用一個如此新穎大膽的手法說出來(How to say)。 多得YouTube，呢類短片先可以發揚光大，因為電影台播的話，唔單止貴，更會惹來大量無謂人的投訴。
American Apparel 最近推出了名為”Le Sac Dress” 的連身裙系列，人地平時例牌當然係有網上產品目錄，但除了做得頗靚的網頁及模特兒示範外，更有趣的，是他們在YouTube內播放的12款不同穿法的真人示範。 我當然唔係對呢款裙有興趣啦大姐，但我覺得用Video補網頁的不足，此法相當高名，抵讚。
早略有聽聞何韻詩今次這張新大碟的主題是玩Heroes這條大橋，但無諗過佢會玩到咁大。 無錯，何韻詩今次在網上公開召集五湖四海的超級英雄，一起參與拯救地球(查實係有機會成為佢MV內的角色)。 這支網上徵召Super Heroes的短片，除了有何韻詩的超級英雄造型外，仲有飾演路人甲超浮誇演技的何韻詩同時現身，真係俾佢吹到啤一聲，怕且佢真係要搵詹sir補下堂。 此外，仲有一條示範短片，自命有過人Super power的你，快出動！
多得T-Mobile，世界各地愈來愈多廣告商，都相繼拍攝了好些疑似街頭即興快閃的viral video。 唔好打呵欠住，如果你以為呢條又係街頭即興快閃黨的viral video，你就大錯特錯，呢條片呢……哎呀，都係自己睇，開左估就唔好玩。 我淨係想講，真希望香港的廣告客戶會睇一睇呢條片，作為一個普通消費者，你話我知你睇完會唔會記得呢個產品係乜？(我就會)。如果想人地記得你的產品，做得好的話，真係擺到最後果一鏡都夠，由頭出到尾，觀眾反而覺得你小家，枉為大牌子。
多得YouTube，stop motion video本來並非甚麼新鮮事，但當大家以不同的方式手法角度去演譯，卻又好像能變化出無數百看不厭的短片。 今個週末，先看了這一支表面上是自家製作，卻原來又是買廣告的所謂viral短片。 片中仁兄曬了近一萬張相，製作了這條Stop motion video，不到最後揭盅，你不會知道原來係廣告，但這三分鐘零五秒真的毫無冷場，重點係，你唔會覺得被騙而「頂」一聲，我睇完立即要笑住口幫她傳開去，咁先為之viral。 誰知，我才剛剛post了上Twitter及Facebook，熱心網友已爭先恐後出來踢爆，話說原來此片另有出處，雖然stop motion玩了這麼多年，很難說誰才是original，但這個”reference”與這支廣告片實在有太多雷同，不禁感概，哎，原來天下文章都有出處，抄得快，才是好世界。
簡單來說就是這樣的，將USB手指插入這部Fiat的環保車內，開車去，落車熄匙時記住帶埋隻USB手指，回家後插入電腦，你就可以得悉你剛才開車時，所曾排出的二氧化碳量的資料，電腦軟件更會為你分析，如何可以減低二氧化碳的排放量。 操作概念，其實有點像Nike+，不過對波鞋變了一部Fiat，iPod就變了USB手指，留意一下，哦，原來出自同一間公司AKQA的手筆，作為全球頂尖的互動廣告公司，他們的作品已超越了一般互動廣告的界限。 我解釋得唔清楚？以下卡通短片，老幼咸宜，一睇就明。
最近，相信大家都看過史迪仔和哈林上街跳舞的電視廣告，這個「史迪仔好玩夏日」是香港迪士尼樂園今年暑假的特別主題節目，我們公司亦有幸參與了一個互動遊戲的製作，你除了可以在迪士尼玩到這個遊戲外，你亦有機會在尖沙咀，以及稍後的銅鑼灣的巴士廣告牌見到這個遊戲。 看見這個好像上了電的小朋友玩得這麼高興，同事們覺得，當日趕得再辛苦都真係值得。 如果你家中的電腦有Webcam，你也可以體驗一下這個遊戲的網上版，不過勸你唔好玩到好似呢個細路咁癲，費事晌屋企打爛野啦。 http://park.hongkongdisneyland.com/hkdl/html/Summer/zh_HK/game.html
Admomo的老闆雲絲頓報料(佢老哥間公司係做網上廣告的Monitoring，我所屬的公司都有幫襯)，早幾日，他意外地發現了老麥剛推出的一系列魚柳包減價廣告，由6月9-15日的原本標價$13.3，到了6月16日打後，卻開始改為$12.3。 平足一蚊，莫非海鮮來貨平了所致？有無人可以話我知魚柳包單買正價多少錢？
我果頭講完vodafone的mashup活動，果頭又見到另一個mashup大行動，呢個活動，仲要係更簡單更low tech。 究竟由頭到尾齋玩一個Bb Chord，效果會係點？ 呢二十位仁兄仁姐，各自用不同的樂器，有小號、有NDS、有電子鼓、有結他、有玩具等等等，齊齊在一個Bb Chord上，自由即興，即係話，就算點亂Q咁彈，合奏起來都唔會亂七八糟。 更好玩的是，這二十段音樂演奏短片，可以自由組合播放，單丁播又得，全部一齊播都得，得左。 “play these together, some or all, start them at any time, in any order” 唔好執輸，快d玩快d玩。 http://inbflat.net/
Mashup是Web 2.0時代最常用的Online Marketing手法之一，方法其實很簡單，一般就是以網上的Social Media平台，讓大眾自由參與，從而進行大規模的集體創作。 由於不少Social Media平台(例如Google Map)都採取開放源碼政策，因此，透過Mashup活動，亦間接地有利將其平台發揚光大。 這個近期vodafone在英國推出的宣傳活動，便是Mashup的最佳例子。 http://www.ukholsmap.com/# 活動目標相當簡單，就是要宣傳今年暑假，vodafone將大手筆地，免費讓客戶們享用其國際漫遊活動。 如此普天同慶，vodafone亦順道叫大家齊齊透過Twitter，分享一下你(身處英國的用戶們)今年暑假即將前往海外目的地，你只要將你的Tweet先寫上#ukhols，之後連同你的年齡、性別、所住地方的區碼頭幾個字，最後，當然就是你的旅遊目的地，譬如咁”#ukhols 25 F B12 Gran Canaria”，你果頭Tweet完，你的行程路線，以及所發出的Tweet，就會很快地出現在這個宣傳網站的Google Map上。 表面上沒甚Gimmick，玩法亦阿水都識，但這活動有趣之處，便是一如Twitter般地充滿著即時性的對話，其互動內容，幾乎每分每秒也在變。寫blog之時，發覺香港居然是10大旅遊目的地的第9位，第一位則為美國的紐約市。 我覺得香港一般的網絡廣告，都太注重技術層面的新穎性，這類人性化得來，卻將技術放到最後方的創意，一般較為少見，值得我們學習學習。