adidas

adidas Original的Starwars系列

adidas Original將於2010年1月推出Starwars系列,除了星戰化的經典鞋款外,當然少不了服裝系列,服裝中除了例牌到有點「行」的圖案Tee外,還是以黑武士的那款連帽衛衣較具誠意,之不過,如果真係成套著出街,你都咪話唔Geek。 有興趣知多一點的話,可以到adidas的網上商店睇睇。 我對白兵這款鞋最有興趣,全因印上了白兵圖案的這條鞋舌。 adidas還為這個launch做了一個宣傳網站,用上了Facebook Connect又有段煞有介事的短片,但感覺上頗為混吉。

強隊需要霹靂旋風腿

我那個年代嘅靚仔,相信就算如我呢類唔踢波嘅孱弱書生,都依然會對足球小將著迷,最近看見adidas嘅新廣告,見到「強隊需要霹靂旋風腿」呢句認真得來帶點凄美地幼稚嘅廣告語,立即我勾起了當年看足球小將時嘅美好回憶。 電視廣告中嘅施丹,有點像當年一手發掘出戴志偉嘅勞比度叔叔,當然,果位真係當正足球係老死嘅美斯,亦施展出逢人過人嘅優美腳法,風采與泰來不相佰仲,射球果刻雖然無使出衝力射球,但腳法巧妙敏捷之處亦甚有戴志偉嘅影子。 你唔好以為我飲醉酒呀,我真係好認真寫呢篇Blog o架,足球小將當年真係著adidas o架。

Nike 曲線宣傳迎奧運?

早陣子在這裡問大家,知不知道那個是今年北京奧運的官方運動品牌,趁今日是北京奧運的第一天,就趁現在開估吧,答案就是adidas。(但昨天看完奧運開幕,感覺上我覺得李寧牌才是主人家) 所謂的官方指定品牌,即是說,除他們以外,其他品牌絕對不能使用奧運相關的照片圖案或標語,想借啲意提下奧運或咩咩國際體壇盛事都不能。 如果你是奧運大會指定抽油煙機,你會覺得是鬼旦喇,但如果你係果啲與宿敵唔係你死就我亡的品牌,爭起上來就真係唔講得少,一定要趕到絕。 但呢個世界有所謂過場梯與張良計,你趕絕我,我可以打游擊。 早陣子到過北京798藝術區,途中赫然看見一棟Nike運動歷史博物館,屹立於云云藝術館之間。 任何一個運動或波鞋發燒友,見盡歷代波鞋的鞋海及發展史,都一定開心到暈,如果你先在門口登記,借部iPod TOUCH作為館內參觀的聲音導覽,臨走前,Nike會醒送你一本圖文並茂嘅運動用品簡史,俾你番屋企向朋友曬命,呢啲之唔係就係完美嘅Brand Experience。 更重是要,Nike極之大方,博物館內,照片任拍。 趁北京奧運期間開這個運動歷史博物館,Nike在暗地裡打甚麼算盤,大家心知肚明。 Nike的最後殺著,是他們贊助的幾位中國運動員,如果他們都能奪金,是不是官方品牌,都真係話之你。 係呀,Nike於奧運期間的主題網站,就索性叫:Nikegold.com.cn。 你出三間,我有關刀,叉叉叉,誰勝誰負,還看運動場上一較高下。